Entri mi ku bo
Data 04/01/2017 13:15:33 | Tópico: Poemas
| Entri mi ku bo
Entri mi ku bo,
Ezisti un amor jenerosu:
Batizadu na sol di certesa,
Doxi sima mel,
lonji di odiu,
Dignu di podiu,
Iscritu na anel di compreenson y atenson,
Emoson ki ka tem esplicason,
Ki ta travessa rius di dificuldadi,
Forti y kunspiradu ku amizadi,
Sabi sima massa di galinha terra y ki ka ta medidu,
Brilhanti moda strela y karegadu di sentimentu,
Pesadu na balansa di karinhu,
Semiadu na txon di verdadi y presu a nha distinu,
Bunitu sima briza,
kurvadu na avenida di bu sorissu,
Autentikadu na kartório di liberdadi y konfiansa,
Bistidu na lua di deseju y prazer,
kor di arku - iris,
Entri mi ku bo,
Ezisti um amor na horizonti sem fim:
Enfin,
Un fonti di inspirason,
Ki ka ten igual.
Adilson Pinto
Adilson Pinto
|
|